மிட்டாய் 18.7.2010

படிக்கிற காலத்தில், ஜீன்ஸ் படம் ரிலீஸிற்கு ஆயத்தமாகிக் கொண்டிருந்தது. அதன் பாடல்கள் எல்லாம் சூப்பர் ஹிட். நண்பர்கள் எல்லாம் அதைப்பற்றி பேசிக்கொண்டிருக்கும் போது. ஒருத்தன் சொன்னான். டேய் ஒரு சூப்பர் படம் பார்த்தேன்டா என்னா ஸ்டோரி. பாட்டெல்லாம் சூப்பரா இருந்திச்சு தெரியுமா? அப்படின்னு கதையை சொன்னான்.

கேட்டுவிட்டு எல்லோரும் சேர்ந்து மொத்தினார்கள். பின்னே சின்னதம்பி படத்தை டிவியில பார்த்துட்டு கதை சொன்னா யாருக்கு கோபம் வராது.அது மாதிரி இன்னைக்கு சில விசயங்கள் அரதப்பழசா இருக்கலாம் பொறுத்தருள்க..

===================

நேற்றுதான் ஏர்டெல் சூப்பர் சிங்கர் அல்கா அஜீத்தின் சிங்காரவேலன் பாடல் பார்க்க முடிந்தது. வாய்ப்பே இல்லை என்ன ஒரு அருமையான குரல், பிசிறேயில்லாமல்! பாடல் முடிந்ததும் அனைத்து பாடகர்களும் எழுந்து நின்று கைத்தட்டியபோது. எனக்கே ரெண்டு ஐஸோட அவுட்டர் எட்ஜில் இருந்தும் வாட்டர் வந்திருச்சு.

என்னதான் மலையாளிஸ் மேல கோபம் இருந்தாலும், இசைக்கு ஏது மொழிங்கிறதால அல்காவிற்கு வாழ்த்துகள்.

=====================

ரொம்ப நாளைக்கப்புறம் மீண்டும் இருந்த இடத்தை விட்டு நகராமல் ஒரு படம் முழுவதையும் பார்க்கவைத்து விட்டார் இயக்குனர் சற்குணம். சில படங்கள் பார்க்கிற நம்மையும் கதைக்குள்ளே தொபுக்கடீர்ன்னு இழுத்துப்போட்டுவிடும். முதல் காட்சியில் இருந்தே அந்த வேலையை கச்சிதமாக செய்கிறான் களவாணி.

இப்படி எடுத்தாத்தான் வெற்றி பெரும் என்று எந்த எண்ணமும் இல்லாமல் இயல்பான ஒரு கதையை கொடுத்த இயக்குனருக்கு நன்றிகள். விமலுக்கு நல்ல வாய்ப்புகள் அமைய வாழ்த்துகள். (இது மாதிரி ஒரு ஆள் கூட இருந்தா கஷ்டம்தான் :)).

======================

இயல்பான கதை என்ற உடன் ஞாபகத்திற்கு வருவது மலையாள படங்கள்தான். ஏஷியாநெட்டில் மதியம் போடும் திரைப்படங்கள் எங்களின் ஒரு மணி நேர தூக்கத்தை கெடுத்து விடுகின்றன. பாதியிலேயே அணைத்து விட முடிவதில்லை. எல்லாமே 80 90 களில் வெளிவந்த படங்கள்.

இப்போதெல்லாம் கேரள மக்களே நமது சிங்கத்தையும் வேட்டைக்காரனையும் விரும்புவதால் அக்கரைச்சீமையிலும் முன்பு போல் இல்லாமல் இப்போது அடிதடி படங்கள்தான் அதிகம் வருகின்றன. எப்படி இருந்த மலையாள சினிமா....

=======================

நண்பர் கவிஞர் ஆறுமுகம் முருகேசன் ‌வெள்ளியன்று இங்கு வந்திருந்தார். ( அதற்கு இருவாரம் முன்பு சரவணனுடன் சேர்ந்து வந்திருந்தார் ). இங்கு இருக்கும் எங்களுக்கு இது போன்ற சந்திப்புகள் மகிழ்ச்சியாகவும், மன அழுத்தத்தில் இருந்து விடுபடவும், புதிய நம்பிக்கைகள் பிறக்கவும் வழி செய்கிறது. (செ. சரவணகுமார், அக்பர், ஸ்டார்ஜன்)


(செ. சரவணகுமார், ஆறுமுகம், ஸ்டார்ஜன்)

பதிவுலகம், பட உலகம், ஊர், நட்புகள் என்று பல திசைகளில் பயணித்த பேச்சு கவிதையையும் தொட்டு சென்றது. எல்லா கவிதைகளும் புரிவதில்லையே எனக்கேட்ட போது. விளக்கம் சொன்னால் அதுக்குப்பேர் கவிதை இல்லை என்றார்.

தற்கொலை செய்வது கொள்வது பற்றி எழுதியிருந்த கவிதைக்கு கருத்துக்கள் கேட்டார். படித்துவிட்டு, இதை படிச்சதும் தற்கொலை செய்துக்கணும்னு தோணுதுன்னு சொன்னேன். விழுந்து விழுந்து சிரித்தார். (அப்படி என்ன தப்பா சொல்லிட்டேன்).

சும்மா தமாசுக்கு இப்படி சொன்னாலும். நண்பர் ஆறுமுகத்தின் கவிதைகள் தொடர்ச்சியாக உயிரோசை, கீற்று போன்ற இணைய இதழ்களில் வெளியாவது அவரது திறமைக்கு சான்று.

அன்றைய பொழுது இனிமையாக கழிந்தது.

,